Faireachlann an Aontais maidir leis an slabhra agraibhia

Forbhreathnú

Go luath in 2024, mar fhreagairt ar na hábhair imní a chuir feirmeoirí agus gníomhaithe eile an tslabhra agraibhia in iúl, chuir an Coimisiún Eorpach páipéar machnaimh i láthair maidir le pacáiste tacaíochta an Choimisiúin d’fheirmeoirí an Aontais ina moltar bearta chun feabhas a chur ar sheasamh na bhfeirmeoirí i slabhra an tsoláthair bia. Ar cheann de na príomhbhearta bhí cruthú AFCO, dírithe ar fhaireachán a dhéanamh ar chostais táirgthe, ar chorrlaigh, agus ar fhaisnéis a mhalartú maidir le cleachtais trádála.

Roghnaíodh comhaltaí AFCO trí ghlao poiblí ar iarratais. Tionóladh an chéad chruinniú den ghrúpa an 15 Iúil 2024 agus chuir an Coimisinéir Janusz Wojciechowski tús leis.

Príomhaidhm de chuid na Faireachlainne is ea muinín a chothú i measc na ngníomhaithe uile ar fud shlabhra an tsoláthair agraibhia, agus le húdaráis phoiblí an Aontais, rud atá ríthábhachtach chun a áirithiú go n-íocfar go cothrom leis na gníomhaithe uile as a rannchuidiú agus go n-oibreoidh siad i slabhra an tsoláthair agraibhia.

Den mheon sin, is iad seo a leanas príomhchuspóirí AFCO:

• Faisnéis a mhalartú agus comhthuiscint a fhorbairt ar shaincheisteanna a dhéanann difear do shlabhra an tsoláthair bia.
• Trédhearcacht a mhéadú maidir le costais agus corrlaigh laistigh den slabhra.
• Saineolas a sholáthar agus cleachtais trádála agus socruithe conarthacha a shainaithint a bhféadfadh tionchar dearfach nó diúltach a bheith acu ar fheidhmiú an tslabhra.

Sa mheántéarma, oibreoidh AFCO chun modheolaíochtaí agus táscairí a chruthú chun measúnú agus faireachán a dhéanamh ar struchtúir chostais agus ar dháileadh corrlach agus breisluacha.

Braitheann AFCO ar rannchuidithe óna chomhaltaí agus ar obair fhaireachlanna earnála margaidh an Choimisiúin chun a chuspóirí a chomhlíonadh.

Struchtúr agus comhaltaí

Is grúpa neamhfhoirmiúil saineolaithe é AFCO, a thugann suas le 80 comhalta le chéile. Déanann comhaltaí AFCO ionadaíocht ar údaráis náisiúnta ó thíortha AE atá freagrach as talmhaíocht, iascach, dobharshaothrú agus slabhra an tsoláthair bia. Áirítear ar chomhaltaí an ghrúpa freisin eagraíochtaí a dhéanann ionadaíocht ar pháirtithe leasmhara ó gach céim den slabhra soláthair – lena n-áirítear feirmeoirí, soláthraithe ionchuir, tionscal an bhia, trádálaithe, iompar, lóistíocht, miondíoltóirí agus tomhaltóirí.

Liostaítear comhaltaí AFCO anseo thíos.

Tá tuilleadh eolais faoi ghníomhaíochtaí AFCO le fáil i gClár Ghrúpaí Saineolaithe an Choimisiúin.

Doiciméid don chruinniú

Ó mhí Mheán Fómhair 2025 ar aghaidh, is féidir teacht ar na doiciméid ábhartha uile, lena n-áirítear na cláir oibre, na miontuairiscí agus aighneachtaí na rannpháirtithe, ar Chlár an Choimisiúin de Ghrúpaí Saineolaithe.